Barso purani yeh baat hai,
Choti si ek ladki thi;
Dil mein uske aas yoon jagi
Apni kahani dhundne nikli thi.
Kaha kaha na dhunda usne,
Kaha kaha yoon bhatki thi;
Galiyon mein, logo mein,
Paharo mein samunder mein,
Yaha tak ke baarish aur dhoop mein bhi,
Apni kahani dhoondhti firti thi bechari.
Par afsoos, usse uski kahani nahi mili.
Zindagi ke kitaab ke kuch panne adhure thee,
Anjaan sa ek darr tha aur kirdar bade ajeeb thee.
Logo ne kaha jhalli hai,
Utpatang si sapne bunti rehti hai,
Kya bekar mein aas lagaye baithi hai.
Aise milti hai kya kahaniya?
Jaise bazaar mein bikta koi khilona?
Par yeh dekho, ek din aisa hua,
Ke yoon achanak kahani dhundte huye
Woh mujhse aake takrayi.
Woh lekhak nahi, kavi nahi,
Par baaton mein mujhko bohot bhaayi.
Aur usse achanak aisa laga ke shayed
Usko uski kahani mil gayi.
Iss kahani mein dekho woh thi
Jaise hamesha hona chahti thi Azad.
Khush. Thodi si pagal.
Iss kahani mein main tha.
Jaise uski kahani ka ek bada romanchak kirdar.
Woh kehti thi main hawa sa usko disha deta hoon
Woh ek patang jaisi,
Mere bharose urti raheti,
Iss vishwas ke sath ke main woh hoon
Jo bhale na rahe uske paas
Par usse girne nahi dega.
Sawal bohot puchti thi woh.
Pata nahi yeh pyar kaise hota hai?
Log dard mein kaise jeete hai?
Yeh rishte kyun ulajhte hai?
Aur ulajhte toh koi suljhata kyun nahi?
Aisa nahi ho sakta
Ke hum pyar kare bhi aur nahi bhi,
Hum sath ho bhi aur nahi bhi?
Aur iss sab mein bas woh ek kahani mil jaye
Jisse saalo se dhund raha tha dil.
Kahi yaadon ke panno mein koi reh jaaye,
Ya dil ke ek kone mein koi bas jaaye.
Hum haste huye yoon alvida toh keh de
Par milne ki aas reh jaye.
Humari choti si kahani mein,
Aisa bhi toh ho sakta hai na?
~ Suranya
Comments
Post a Comment